Нийтэлсэн: - 2016/06/15 11:50 - Мэдээ, мэдээлэл , Үйл явдал / Event

МАН-аас УИХ-ын сонгуулийн 61 тойрогт нэр дэвшиж буй Монгол Улсын 26 дахь Ерөнхий сайд Сүхбаатарын Батболд Сүхбаатар дүүргийн 11, 12 хорооны сонгогчидтой уулзлаа. Сүхбаатар дүүргээс анх УИХ-д сонгогдож улмаар Монголын Улсын 26 дахь Ерөнхий сайдаар ажилласан С.Батболдыг дүүргийн сонгогчид халуун дотно хүлээн авлаа. Нэр дэвшигч С.Батболд “УИХ-д сонгогдсон цагаасаа тойргоо солилгүй, сонгогчдоосоо урваж шарвасангүй. Тийм шалтгаан, шаардлага байхгүй” гэдгийг хэлсэн юм. Нэр дэвшигч сонгуулийн мөрийн хөтөлбөрөө сонгогчидтой танилцуулж, өнөөгийн нийгэм эдийн засгийн байдлыг цөөн зүйлээр дүгнэж хэллээ. Эдийн засгийн хүндрэл улам даамжирч, улсаараа гадаадын өр, иргэд аж ахуйн нэгжүүд арилжааны банкны зээлийн дарамтад амьдарч байна гэв. Өнөөдөр тэтгэвэр авч байгаа 10 хүний найм нь, гурван аж ахуй нэгжийн хоёр нь, хоёр малчин өрхийн нэг нь арилжааны банкны зээлтэй, олсноо зээлийн хүү төлбөртөө төлж амьдарч байна. 2012 онд МАН дансандаа мөнгөтэй, ханш нь тогтвортой, иргэд нь ажилтай, орлоготой, талхаа таллаж авдаггүй, тосоо граммладаггүй, зээлийн дарамтгүй өндөр өсөлттэй эдийн засгийг хүлээлгэн өгсөн. Харин өнгөрсөн дөрвөн жил улсын данс улааж, долларын ханш 2000 хүрч, ажилгүйчүүдийн тоо гурав дахин нэмэгдэж, талхаа таллаж авдаг граммын эдийн засагтай болсон гэдгийг нэр дэвшигч С.Батболд сонгогчдод тайлбарлав.

АН-ынхан эдийн засаг хямраагүй, ард түмний амьдрал сайжирсан гэдэг ч Сүхбаатар дүүргийн 11, 12 хорооны сонгогчид нэр дэвшигч С.Батболдтой уулзах үеэр амьдрал хүнд, залуус ажилгүй, ахмадууд зээлээс зээлийн хооронд амьдарч байгаагаа учирлав.

Тухайлбал, Сүхбаатар дүүргийн 11 хорооны иргэн Туул хэлэхдээ, “Засгийн газраас иргэдийн 1072 хувьцааны 30 хувийг гурван зуун мянгаар худалдан авах шийдвэр гаргаж иргэд даваа гаригаас арилжааны банкин дээр хонон өнжин оочерлож байна. Гэхдээ хотын төвөөр биш, захын дүүргийн гэр хорооллын банкууд дээр иргэд урт дараалал үүсгэсэн. Үүнээс гэр хорооллын иргэдийн амьдрал ямар төвшинд байгааг харж болно. Өдрийнхөө хоол хүнсээ авч чадахгүй, хоосон хонож буй айл өрх олон байна. Энэ хүмүүс л өнөөдөр мөнгөний сургаар банкин дээр оочерлож байна. Ард түмний сэтгэлзүйгээр ингэж тоглож, доромжилж болохгүй” гэлээ.

Нэр дэвшигч С.Батболд “Тавантолгойн ордын лиценз гаднынхны мэдэлд байсан. 1990 оны үед бизнес эрхэлж байх үед Тавантолгойн ордыг эзэмшиж байсан гаднын компани лицензийн төлбөрөө төлж чадахгүй хамтрагч хайж байсан. Тэр үед миний бие өөрийн бизнесээ босгосон амжилттай ажиллаж байсан юм. Тэгээд Тавантолгойн лицензийг хамтран эзэмших болсон. Ингээд хэсэг хугацааны дараа Тавантолгойн ордын лицензийг төрд буцаан өгсөн. Дараа нь 2009 онд Ерөнхий сайд болсныхоо дараа Тавантолгойн ордыг эдийн засгийн эргэлтэд оруулах талаар нэлээд эрчимтэй ажилласан. Ордыг ард түмний мэдэлд байх ёстой гэж үзээд “Эрдэнэс-Тавантолгой” гэж компани байгуулж, тэндээс иргэн бүрт 1072 ширхэг хувьцааг эзэмшүүлсэн юм” гэлээ. Мөн тэрээр өнөөдөр сонгуультай уралдаж Засгийн газар иргэдийн хувьцааны 30 хувийг худалдаж авна гэж байна. Хамгийн гол нь иргэдийн эзэмшиж буй хувьцаа үнэ цэнэтэй, хувийг нь нэг удаа худалдаж авдаггүй, жил бүр ногдол ашиг авдаг байх ёстой гэсэн юм. Анх иргэдэд 1072 хувьцааг эзэмшүүлсэн шигээ эргээд иргэдийн хувьцаа үнэ цэнэтэй болгож, амилуулахад анхаарал хандуулах ёстой хүний нэг нь С.Батболд гэдгийг Сүхбаатар дүүргийн иргэд онцолж захилаа.

Сонгогчдын ярьсан дараагийн асуудал гэр хорооллын дахин төлөвлөлттэй холбоотой байлаа. Дахин төлөвлөлт нэрээр иргэдийн өөрт нь байгаа хашааны газрыг нь авч орон сууц бариад эргээд орон сууцанд оруулна гэсэн ч өнөөдөр орон сууц битгий хэл, гэр оронгүй, хашааны газар ч үгүй болсон олон иргэн байгааг учирлаж байв. Тиймээс иргэдийг хохироохгүйгээр орон сууцжуулах ажлыг хийх хэрэгтэй гэдгийг иргэд хэлж байсан. Хашааныхаа багахан газраас өөр өмчгүй иргэдийн газрыг булааж орон сууц барьж болохгүй гэдгийг сонгогчид хэлсэн.

Нэр дэвшигч С.Батболд хэлэхдээ “МАН-ын сонгуулийн мөрийн хөтөлбөрт иргэдийг хашаандаа амины орон сууц барих нөхцөлөөр дэмжиж, бага хүүтэй зээл хамруулахаар тусгасан. Мөн өнгөрсөн хугацаанд хашааны газраа алдсан, байраар солино гэж итгээд өнөөдөр байр ч үгүй, хашааны газар ч үгүй болсон иргэдийн хохирлыг барагдуулах тодорхой ажил хийхээр төлөвлөсөн гэлээ.