Ази, Европыг холбосон транзит тээврийн асуудлаар Европын холбоотой хамтран ажиллахаар болов
Ерөнхий сайд С.Батболд Ази, Европыг холбосон транзит тээврийг Монголоор дамжуулбал хамгийн дөт замын нэг болохыг дурдаж, энэ чиглэлээр Европын аюулгүй байдал, хамтын ажиллагааны байгууллагатай хамтран ажиллах хүсэлтэй байгаагаа хэлэв. Уг асуудлаар энэ оны тавдугаар сарын 24-26-нд БНЧУ-ын Прага хотноо болох Европын аюулгүй байдал, хамтын ажиллагааны байгууллагын Эдийн засаг, байгаль орчны чуулга уулзалтад Монгол улсаас төлөөлөгч оролцуулахаа мэдэгдлээ. Мөн Ази, Европыг холбосон транзит тээврийн асуудлыг ирэх онд Монгол Улсад болох Европын аюулгүй байдал, хамтын ажиллагааны байгууллага болон Азийн түнш орнуудын ээлжит бага хурлаар хэлэлцэх нэг гол сэдэв болгох саналыг дэвшүүлэв. Транзит тээврийг хөгжүүлэх чиглэлээр Европын аюулгүй байдал, хамтын ажиллагааны байгууллага, тус байгууллагын гишүүн болон түнш орнуудтай хамтран ажиллах нь далайд гарцгүй манай улсын хувьд Ази, Европын зах зээлийг холбох томоохон боломж бий болох юм гэж Засгийн газрын Хэвлэл мэдээллийн албанаас мэдээллээ.