Нийтэлсэн: - 2016/06/16 10:33 - Мэдээ, мэдээлэл , Үйл явдал / Event , Үйл явдал

УИХ-ын сонгуулийн 61 дүгээр тойрогт МАН-аас нэр дэвшигч Монгол Улсын 26 дахь Ерөнхий сайд Сүхбаатарын Батболд Сүхбаатар дүүргийн 12, 13 хорооны сонгогч, дэмжигчидтэйгээ уулзлаа. Сүхбаатар дүүргийн уг хороонд 32-ын тойрог, долоон буудал орчмын гэр хорооллын айл өрхүүд хамаардаг юм. Одоогоос дөрвөн жилийн өмнө хөдөлмөрийн насны ажилгүй хоёр иргэний нэг нь ажилтай орлоготой, манай улсын ажилгүйдлийн төвшин нэг оронтой тоонд байлаа. Тэгвэл өнөөдөр хөдөлмөрийн насны таван иргэн тутмын дөрөв нь ажилгүй, орлогогүй амьдарч байна. Хамгийн сүүлийн үеийн статистик мэдээллээр ажилгүй иргэдийн тоо 143 мянгад хүрчээ. АН-ынхан 2012 сонгуулиар “Ажилтай, орлоготой монгол хүн” гэсэн уриа лоозон ярьж гарч ирсэн ч бодит амьдрал дээр хэрэгжүүлж чадсангүй. Үүнийг Сүхбаатар дүүргийн сонгогчид нэр дэвшигч С.Батболдод батлан хэллээ.

Нэр дэвшигч С.Батболдыг Сүхбаатар дүүргийн иргэдтэй уулзаж, ярилцах үеэр олон иргэд амьдрал хүнд байгааг учирлаж байв. Тухайлбал, Сүхбаатар дүүргийн иргэн П.Лхамсүрэн “дөрвөн жилийн өмнөхтэй харьцуулахад ард түмний амьдрал улам дордлоо. Өнөөдөр манай дүүрэгт хоол хүнсээ авч чадахгүй хоосон хонож байгаа өрх олон байна. Хөгшүүл нь даралтны эмээ авч чадахгүй, ширхэглэж авах хэмжээнд хүртлээ ядарлаа. Ер нь дөрвөн жилийн өмнө улс бондын мөнгөөр амьдардаггүй, би даралтны эмээ ширхэглэж авдаггүй байсан. Ард түмний амьдрал ийм хэмжээнд хүрсэн байхад “амьдрал дордоогүй” гэж ярихаасаа эрх баригч нам ичих хэрэгтэй. Өмнө нь ядаж л сард 21 мянган төгрөг аваад хоосон хонодоггүй байлаа шүү дээ” гэлээ.

Мөн тэрээр өмнө Монгол Улсын Ерөнхий сайдаар ажиллаж байсан С.Батболд гишүүн УИХ-д дахин сонгогдож ард түмнийхээ амьдралыг дээшлүүлж, цалин тэтгэврийн хэмжээг нэмэгдүүлнэ гэдэгт итгэж байгаагаа хэлсэн юм.

Нэр дэвшигч С.Батболд өнгөрсөн дөрвөн жилийн хугацаанд АН-ынхан цалин, тэтгэврийг нэмэгдүүлэх биш, өр авах ажлыг хамгийн гаргууд хийсэн гэдгийг сонгогчдод сануулав. Тухайлбал, С.Батболд Ерөнхий сайдын үед манай улс гаднаас 665 тэрбум төгрөгтэй тэнцэх хөрөнгийг нэг хувийн хүүтэй зээлж байсан. Гэтэл АН засагласан дөрвөн жилийн хугацаанд 7 тэрбум ам.долларыг гаднаас 11 хувийн хүүтэй зээлж, өнөөдрийн байдлаар Монгол Улсын өр 21 тэрбум ам.доллар буюу 43 их наяд төгрөгт хүрээд байна. АН-ын Засгийн газар дөрвөн жилийн өмнөхөөс зургаа дахин их мөнгийг хэрэглэсэн ч улс орны байдал сэргэсэнгүй, харин ч уналтад орлоо. Энэ их мөнгөөр ард түмний цалин тэтгэврийг нэмсэн үү гэвэл нэмсэнгүй. Харин өр л нэмэгдсэн гэдгийг нэр дэвшигч хэлж байсан юм.

Нэр дэвшигч С.Батболд дөрвөн жилийн өмнө Ерөнхий сайдын ажлаыг хүлээлгэн өгөхдөө Хөгжлийн банкны дансанд 580 сая доллар буюу нэг их наяд төгрөгтэй хүлээлгэж өгсөн бол өнөөдөр улсын данс улааж, өрөндөө баригдаж, цалин тэтгэвэр арай ядан олгож байна. Эцэстээ энэ бүх хүндрэл эрх баригч намын эв нэгдэлгүй байдал, эрх ашгийн зөрчилдөөнөөс үүдэлтэй гэдгийг нэр дэвшигч С.Батболд сонгогчдод хэлсэн. Ирэх дөрвөн жил улс орны байдал хүнд байхыг олон улсын байгууллагууд сануулж байгаа. Тиймээс тулхтай нам, туршлагатай хүнийг дэмжиж эдийн засгийн хямрал, улстөрийн бодлогын алдааг засах боломж байгааг нэр дэвшигч С.Батболд онцолж хэлэв. 2008 оны эдийн засгийн хямралыг зөв бодлогоор даван гарч байсан мэдлэг, туршлага С.Батболд нэр дэвшигчид байгаа учраас сонгогчдынхоо итгэлийг алдахгүй гэдгийг хэллээ.

Ингээд нэр дэвшигч С.Батболд иргэдийн санал бодлыг сонслоо.

-Сүхбаатар дүүргийн 13 хорооны иргэн Ганболд: Аливаа зүйл зөв бодлогоор явбал оргилд хүрдэг. Цаашид төр барих хүмүүс нэг зорилготой, сэтгэлтэй эв нэгдэлтэй улс орноо удирдаж, ард түмний амьдралыг дээшлүүлэх хэрэгтэй байна. Нурсан эдийн засгаа босгохын тулд мэдлэгтэй, туршлагатай хүн төрд хэрэгтэй. Ийм хүний нэг нь С.Батболд гэж итгэж байна.

-Сүхбаатар дүүргийн 13 хорооны иргэн н.Осоржав: Өнгөрсөн дөрвөн жилийн хууль бус УИХ ажиллаж, хууль бус хууль баталж, улс орон нэг хүний санал, эрх ашгаар явдаг боллоо. Нэг Монгол хүний эрх ашгийн төлөө бус нэг нам, фракцын эрх ашгаар улс орноо удирдаж, эцэстээ иргэд нь ажилгүй орлогогүй, хоосон хонож байна. Засаг төрийг тогтворгүй болгож, удаа дараа огцруулж дөрвөн жилийг дуусгалаа. Үндсэн хуулийн цэц, Мэргэжлийн хяналтын газар, Авлигатай тэмцэх газар удирдлагагүй байна. Улсын хууль, хяналтын байгууллагыг ингэж олон сар удирдлагагүй, улс орон эзэнгүй юм шиг байлгаж болохгүй. Энэ бүхнийг тулхтай улстөрийн хүчин, туршлагатай хүмүүс гарч засах шаардлага бидний өмнө байна. МАН туршлагатай тулхтай нам. Нэр дэвшигч С.Батболд бол мэдлэг боловсролтой, зүтгэлтэй төрийн хүн. Өмнө нь Гадаад хэргийн сайд, Ерөнхий сайд хийж байсан учраас улс орноо хүндрэлээс гаргана гэж итгэж байна.

Сүхбаатар дүүргийн 12, 13 хорооны иргэдийн дараа нь үерийн далан, борооны ус зайлуулах хоолой байхгүйгээс гэр, хашаа нь усанд автаж, хүндрэлтэй орчин нөхцөлд амьдарч байгаагаа хэлж байв. Нэр дэвшигч С.Батболдыг энэ асуудалд анхаарал хандуулж, шийдэх шаардлагатай байгааг захилаа.