Гашуун сухайт”, “Шивээ хүрэн”, “Ханги” боомт 24 цагийн горимд шилжинэ

Засгийн газрын ээлжит бус 2 дугаар хуралдаанаар нүүрсний экспортын талаар авах зарим арга хэмжээний тухай хэлэлцээд тогтоол гаргав. Манай  Улсад 36 орд газар нүүрс олборлох үйл ажиллагаа явуулж байгаагаас төрийн өмч давамгайлсан 2, орон нутгийн өмч давамгайлсан 3 хувьцаат компани байна. Бусад нь хувийн болон гадаадын хөрөнгө оруулалтад тулгуурлан ажиллаж байгаа юм.

Нүүрсний салбарт сүүлийн жилүүдэд хувийн хэвшлийн хөрөнгө оруулалт нэмэгдсэн нь нүүрс олборлолтын хэмжээ огцом өсч, улс орны эрчим хүчний дотоодын хэрэгцээг бүрэн хангаад зогсохгүй 2003 оны сүүлээс БНХАУ-д нийлүүлж, улсын эдийн засгийн хөгжилд бодитой дэмжлэг үзүүлж эхэллээ. Нүүрсний экспортын хэмжээ жил бүр нэмэгдсээр өнгөрсөн оны эцсийн байдлаар 6.1 сая тонн нүүрсийг экспортод гаргажээ. Энэ нь манай улсын экспортын бүтээгдэхүүнд нүүрсний эзлэх хувийн жин нэмэгдэх нөхцөл бүрдэж буйг харуулсан үзүүлэлт юм.

Нүүрсний экспорт нь нүүрс олборлох, тээвэрлэх, экспортлох, эдгээр үйл ажиллагаанд төрийн байгууллагуудын зүгээс хяналт тавих, зохицуулах зэрэг үйл ажиллагааны хувьд өргөн хүрээг хамрах боллоо. Иймд аж ахуйн нэгж, иргэд, төрийн байгууллагууд, орон нутгийн захиргаа, удирдлагын ажлын уялдааг хангах, зохицуулах үүрэг Засгийн газарт ногдож, нүүрс экспортлогч компаниудын үйл ажиллагаанд тулгамдаж буй асуудлыг шийдвэрлэх тодорхой арга хэмжээнүүдийг авч эхлэх шаардлагатай байна.
  
Засгийн газрын тогтоолоор:

• Стратегийн ач холбогдолтой томоохон орд газрыг эдийн засгийн эргэлтэд оруулах ажил хэрэгжиж эхлэн, нүүрс олборлох, экспортлох хэмжээ эрс нэмэгдэж байгаатай холбогдуулан “Гашуун сухайт”, “Шивээ хүрэн” боомтыг ачаа болон зорчигчдын хөдөлгөөний урсгалыг төрөлжүүлэн саадгүй нэвтрэх боломжтой, дэд бүтэц, суурин газар бүхий олон улсын жишигт нийцсэн хилийн боомт болгон өргөтгөх ерөнхий төлөвлөгөө, холбогдох төслүүдийг 2010 оны 1 дүгээр улиралд багтаан Засгийн газарт оруулах,
• Эдгээр боомтуудад авто пүү, рентген болон шалган нэвтрүүлэх бусад тоног төхөөрөмж /гэрэлтүүлэг, камерийн хяналтын систем/ суурилуулах, лаборатори, ариутгал халдваргүйжүүлэлтийн пункт байгуулах,
• Байгаль, экологийн тэнцвэртэй байдлыг хангуулах зорилгоор Өмнөговь аймгийн Ханбогд сумын “Цагаан хад” хэмээх газарт нүүрс ачиж буулгах цэгийн одоогийн үйл ажиллагааг өөрчилж, байгаль орчинд сөрөг нөлөөгүй техник, технологи нэвтрүүлж, олон улсын стандарт, жишигт нийцсэн нүүрс шилжүүлэн ачих байгууламжийг барих,
• “Гашуун сухайт”, “Шивээ хүрэн”, “Ханги” боомтыг энэ оны 2 дугаар сард багтаан 24 цагийн үйл ажиллагаатай, олон улсын боомт болгох талаар БНХАУ-ын талтай холбогдох хэлэлцээ хийж хэрэгжүүлэх арга хэмжээ авах,
• Тус боомтууд 24 цагийн горимд шилжихтэй холбогдуулан хил, гааль, хяналтын байгууллагын орон тоог нэмэгдүүлэх, шаардагдах хөрөнгийн асуудлыг судалж, Засгийн газарт энэ оны 1 дүгээр улиралд багтаан оруулах,
• Улсын төсвийн орлогыг нэмэгдүүлэх, экспортыг дэмжих зорилгоор төр, хувийн хэвшлийн түншлэлд тулгуурлан ашигт малтмалын бүтээгдэхүүн экспортолж байгаа аж ахуйн нэгж байгууллагын хөрөнгөөр Тавантолгойн орд газраас “Гашуун сухайт болон “Ханги” хүртэл автозам бариулах зэрэг асуудлыг холбогдох албан тушаалтнуудад үүрэг болгов.
Түүнчлэн аж ахуйн нэгж, компани, төрийн захиргааны байгууллага, нутгийн удирдлагын байгууллагын ажлын уялдаа холбоог хангаж, хилийн боомтын үйл ажиллагааг зохицуулах үүрэг бүхий Засгийн газрын Бүрэн эрхт төлөөлөгчийг томилон ажиллуулахаар шийдвэрлэв.

Товчхон:

• 2010 оны 1 дүгээр сарын 12-14-ний өдрүүдэд Улаанбаатар хотноо Худалдаа, эдийн засаг, шинжлэх ухаан, техникийн хамтын ажиллагааны Монгол-Унгарын Засгийн газар хоорондын комиссын III хуралдааныг зохион байгуулах зардлыг Засгийн газрын нөөц сангаас гаргах болов.