Нийтэлсэн: - 2010/09/30 00:29 - Мэдээ, мэдээлэл , Мэдээ

Канад Улсад албан ёсны айлчлал хийж байгаа Монгол Улсын Ерөнхий сайд С.Батболдод Канадын сан хөмрөгийн зөвлөлийн дарга, Ази Номхон далайн хөтөлбөрийн сайд, парламентын гишүүн  Стоквэлл Дэй бараалхав. Канадын нөлөө бүхий улс төрчдийн нэг энэ эрхэм Монголд элэгтэйгээрээ манайханд хэдийнэ танил болсон хүн юм. Ерөнхий сайд С.Батболд уулзалтын эхэнд өөрийн орны дотоодын нөхцөл байдал, Засгийн газраас явуулж буй хөгжлийн бодлого зэргээс танилцуулаад Канадын эдийн засгийн хөгжлийн загвар туршлагаас судлах сонирхолоо илэрхийлэв. Ялангуяа дэд бүтэц, барилга, хөдөө аж ахуй, үйлчилгээ,төрийн алба болон бусад олон салбарт Канадын загварыг нэвтрүүлэх боломжтойг дурдлаа.

“Манай хоёр орон цаг агаарын нөхцөл байдлаас гадна  өргөн уудам газар нутагтай, хүн ам сийрэг, хүчирхэг хөршүүдтэй, байгалийн баялаг арвинтай, нээлттэй засаг төртэй зэргээрээ адил төстэй. Энэ чанараараа  өндөр хөгжилтэй Канад улсын загвар бидэнд ач холбогдолтой. Харин энэ загварыг нэвтрүүлэх явц нь харилцан ашигтай байх учиртай” хэмээн  Ерөнхий сайд С.Батболд ноён Стоквелл Дэйтэй уулзахдаа онцлов. 

Түүнчлэн Монгол Улс гадаад түншүүдтэйгээ харьцахдаа буцалтгүй тусламжийг шүтэх бус хөгжлийн хамтын ажиллагааг илүүд үзэхийг чухалчилж байгаагаа Ерөнхий сайд хэлээд Канадын олон улсын хөгжлийн агентлаг / СИДА /-аас хэрэгжүүлж байгаа төсөл хөтөлбөрүүдэд Монгол Улс багтан орох сонирхолтой байгаа гэлээ. Ноён Стоквэлл Дэй хэлэхдээ “Ерөнхий сайд Батболд таны айлчлал Канадад хүн бүрийн анхаарал татсан үйл явдал болж байна. Канадын Ерөнхий сайд таньтай уулзсаныхаа орой өөрийн намын болон танхимынхаа гишүүдэд хандаж Монгол Улстай хамтын ажиллагаагаа эрчимжүүлж ажиллахыг зөвлөсөн. Ардчиллын замаар замнаж буй хүчтэй хөгжих их боломжтой Монгол орон Канадыг хөгжлийн загвар орноо гэж үзэж байгаад ерөнхий сайд Стивэн Харперийн сэтгэл их хөдөлсөн бололтой” гэлээ. Канадын эдийн засгийн хөгжлийн гол салбар болохын хувьд уул уурхайн салбарт маш өндөр хатуу стандарт хэм хэмжээг тогтоодог тухайгаа ноён Стоквелл дурьдаад энэ стандарт загвар Монгол улсын хөгжлийн нэг тулгуур болсон уул уурхайн салбарт чухал туршлага болох юм гэсэн юм. Мөн түүнчлэн  Ерөнхий сайд С.Батболдын тавьсан Канадын олон улсын хөгжлийн хөтөлбөрүүдэд  хамрагдах ,харилцан туршлага судлах зэрэг саналыг дэмжиж ажиллахаа илэрхийлэв.  Ноён Стоквелл Дэй Ерөнхий сайдтай уулзахдаа Монгол Улс ингэж хурдтай хөгжиж дэлхийн тавцан дээр гарч ирж байгаа нь гайхамшиг хэмээн онцолж байв