Нийтэлсэн: - 2011/09/01 15:05 - Мэдээ

Энэ жил орчин үеийн гадаад харилцаа үүсч хөгжсөний 100 жилийн ой тохиож буй. Ойн хүрээнд өндөр хэмжээний айлчлалууд ёстой л шил дарж байна. Энэтхэг, Солонгос, Финляндын Ерөнхийлөгч, АНУ-ын дэд Ерөнхийлөгч манай улсад хөл тавьсан энэ өдрүүд нойрмог байгаа улстөрийн ертөнцийг сэргээж чадсан.

  Солонгосын Ерөнхийлөгч Ли Мен Багийн айлчлалын нэг зорилгыг хэвлэлийнхэн Тавантолгойтой холбон тайлбарлаж байлаа. Тавантолгойн шалгаруулалтаас Солонгосын концсорциум хасагдсан, эсэх талаар илүү мэдээлэл авахаар ирсэн гэсэн жиг жуг айлчлалын үеэр дэгдсэн. Гэхдээ мэдээж айлчлалын албан мэдээлэлд энэ талаар ямар нэг талаар дурдсан зүйл үгүй. Энэ айлчлалыг хоёр орны харилцааг шинэ шатанд гаргалаа гэсэн дүгнэлт дагасан. Солонгосоос манай талд оношлогооны төвтэй болоход зориулж 300 сая ам.долларын хөнгөлөлттэй зээл олгохоор болсон нь айлчлалын онцолж хэлэх агшин байлаа. Айлчлалын үеэр яригдах байх гэж хүлээж байсан асуудлын нэг бол хоёр орны иргэд визгүй зорчих асуудал. Ерөнхий сайд С.Батболд БНСУ-д айлчлахдаа энэ асуудлыг хөндөж байсан юм. Солонгосын хувьд энэ асуудал дээр нислэгийн давтамжийг дээшлүүлнэ гэсэн дипломат хариултыг өгснөөс өөр тодорхой байр суурь илэрхийлсэнгүй. Гэхдээ ганцаарчилсан уулзалтын гол яриа хөөрөө Тавантолгой байсан гэх мэдээллийг хэвлэлүүд цацсан ч энэ талаар ямар нэгэн тодорхой мэдээлэл алга байна. Ямартай ч Солонгосын Ерөнхийлөгчийн айлчлал бодит үр дүнтэй болж чадсан. Дараагийн нэг том зочин бол АНУ-ын дэд Ерөнхийлөгч Жозеф Байден. АНУ-ын дэд Ерөнхийлөгчийн түвшний айлчлал 67 жилийн өмнө болж байсан гэдэг утгаараа энэ эрхэм анхаарал татахгүй байх аргагүй зочин. Айлчлалын үеэр бодитой гэж хэлж болохоор гэрээ хэлэлцээр энэ төрд өрнөсөнгүй. Гэхдээ Америкийн дэд Ерөнхийлөгчийн цөмийн салбарт хамтрах, цөмийн хаягдлын асуудлаар тохиролцоонд хүрэх гэж ирсэн гэх таамаглалыг гадна, дотны хэвлэлийнхэн хийж байсан. Гэхдээ айлчлалын үеэр энэ талаар ямар нэг байр суурь илэрхийлэгдээгүй. Жозеф Байден Ерөнхий сайд С.Батболдын урилгаар манай улсад зургаан цаг айлчилсан. Ерөнхий сайд түүнтэй уулзах үеэрээ “Таны айлчлал манай улс ардчиллыг эргэлт буцалтгүйгээр сонгож, манай ард түмэн улс төрийн эрхэнд байгаа аль ч хүчин ардчиллыг дээдэлж буйг АНУ хүлээн зөвшөөрч байгаагийн тод илрэл юм. АНУ нь Монгол Улсын гуравдагч хөршийн иж бүрэн харилцааг хөгжүүлж буй орон. Хоёр орны хувьд худалдаа, эдийн засгийн хамтын ажиллагааны хүрээнд эдийн засгийн харилцааны хүчирхэг түншлэл бий болгох боломжтой. АНУ өндөр технологитой, харин манай улс байгалийн баялагтай төдийгүй улс төрийн болоод хөрөнгө оруулалтын таатай орчинтой” гэж онцолсон. Уг уулзалтын үеэр Жозеф Байден “АНУ Монголын гуравдагч хөрш хэмээх хүндтэй нэр зүүж байгаадаа таатай байна. Тиймээс сайн хөрш байхыг эрмэлзэх болно. Монгол Улсыг сайхан ирээдүйтэй орон гэж хардаг” хэмээн онцолсон.
Эх сурвалж: http://guum.mn