Нийтэлсэн: - 2011/10/06 15:10 - Мэдээ, мэдээлэл , Мэдээ

- МОНГОЛ УЛСЫН ЕРӨНХИЙ САЙДЫН ИЛГЭЭЛТ -

Европд байгаа монголчуудын чуулга уулзалтад оролцогчдод

Эрхэм хүндэт Монголчуудаа, залуусаа,

Эрхэм хүндэт чуулганы төлөөлөгчдөө,

Соёл түүхийн эртний өв уламжлалт Европ тивийн хөгжил дэвшлээрээ тэргүүлэгч улс орнуудад ажиллаж сурч амьдарч байгаа элэг нэгт Монголчууд та бүхэндээ Монгол Улсын Засгийн газрын болон нийт Монголчуудынхаа нэрийн өмнөөс чин сэтгэлийн  мэндчилгээ дэвшүүлж, сайн сайхны ерөөлийг өргөн, чуулганы үйл ажиллагаанд амжилт хүсье.

Энэхүү чуулга уулзалт зохион байгуулагдаж байгаа 2011 он бол монгол өвөг дээдсийн маань анхлан үүсгэсэн төрт улс Хүннү гүрний болон Мянганы суут хүн Чингис хааны байгуулсан Их Монгол Улсын, үндэсний тусгаар тогтнолоо дахин сэргээн тогтоосон Үндэсний эрх чөлөөний хөдөлгөөн, Ардын хувьсгалын агуу тэмдэглэлт тэгш ойнууд тохиосон манай орны түүхэнд онцгой ач холбогдол бүхий жил билээ.

Өнөөдрийн Монгол Улс даяаршлын эрин зуунд эх орныхоо тусгаар тогтнол, монгол үндэстнийхээ баялаг өв санг өнөө хүртэл хадгалж, улам  баяжуулан  хөгжүүлсээр байгаа маань бид бүхний зүй ёсны бахархал мөн. Манай улс эдийн засгийн эрчимтэй хөгжлийнхөө гараан дээр ирээд байгаа энэ түүхэн үед тэрхүү хөгжлийг жинхэнэ ёсоор бүтээгч нь гагцхүү хүн төрөлхтөний жинхэнэ баялаг болох Монгол хүмүүн өөрөө байх нь дамжиггүй юм.

Энэ үүднээс манай Засгийн газраас2011 оныг Хөдөлмөр эрхлэлтийг дэмжих жил болгон зарлаж, тодорхой үр дүнгүүд гарч байна. Түүнчлэн гадаад улс орнуудад суралцаж ажиллаж байгаа Монголчуудаа эх орныхоо бүтээн байгуулалтад урин дуудах “Зөгийн үүр” хөтөлбөрийг санаачилж батлан хэрэгжүүлж байна. Энэхүү хөтөлбөрөө Европын орнуудад өндөр боловсрол, нарийн мэргэжил, баялаг туршлага эзэмшиж байгаа эх орон нэгтнүүддээ танилцуулах, та бүхэнтэйгээ санал бодлоо солилцох зорилго бүхий Чуулга уулзалтыг миний бие Засгийн газрын Тэргүүний хувиар өөрийн ивээл дор зохион байгуулж байгаа юм.

Энэ Чуулга уулзалтаар төр, засаг, хувийн хэвшил, шинжлэх ухааны байгууллагуудын өргөн бүрэлдхүүнтэйгээр Та бүхэн маань хуран чуулж, эх орныхоо хөгжилд нэн шаардлагатай мэргэжилтний хэрэгцээг хангахад томоохон хувь нэмэр оруулна гэдэгт би итгэлтэй байна. Улс орныхоо төлөөх чинхүү сэтгэлээр эх орон нэгтнүүдтэйгээ хамтдаа Монгол Улсынхаа мандан бадралыг гардан бүтээгч нь болж ажиллаж хөдөлмөрлөхийг Ерөнхий сайдын хувиар залуус та бүхэндээ уриалж байна. 

Эх орныхоо хөгжлийн түүчээ болж, нийт Монголчуудаа манлайлан хөгжил дэвшлийг хамтдаа бүтээцгээе.

Монгол Улс маань үүрд дэвжин мандаж,

Монгол хүний сүлд хийморь ямагт бадарч байх болтугай.

МОНГОЛ УЛСЫН ЕРӨНХИЙ САЙД СҮХБААТАРЫН БАТБОЛД

2011 оны 9 дүгээр сарын 30-ны өдөр

                                                             Берлин хот, ХБНГУ